عـيـونــك
يلي عيونك بحر وأمواج العواصف والسيول
فيها غرق قلب شقي عيت عزومه تنجده
ويلي عيونك صيفي وبرد الشتا وكل الفصول
تحوي الهجير وجنتي .. تحوي الثلوج الجامدة
تدرين أنك قصتي وحكاية الفجر الخجول
اللي تبسم للقـــمر وعيا يطوله ساعــــدة
حلم الأمل مات وذبل .. كني الصحاري والسهول
لي ملت أوهام المطر بالصيف تنطر جاهدة
مثل الطفل صرت أنتظر طيفك ونظراتي تجول
حيث أنك أحضـــان الدفا وسط الليالي الباردة
قبلك أبد ما قد خفق قلبي ولا صابه ذهول
ولا صادق أيامي السهر والعين باتت ساهدة
لأنك حبر .. حرف الشعر ، وأنتي الشفا لقلب نحول
صابر على حبك عســـــــى ترجــع سنين شـــاردة
حتى صرخ صمت الصبر .. عاجز ولا عنده حلول
ذاق القهـــر .. مــــــر وسهر .. ونجوم ليله شاهدة
عندك بدا درب الهوى وعندك بدا ليلي يطول
وفي كفك الدافي هوت كل العزيمة الصامدة
